Ka nitin nun

 6:15 ah ka tho a, Dingdi ka kai tho nghal. A exam tur kan ennawn. A ke ah hian rannung zawh infection ang deuh kha a nei a, a kal bao sih suih a, School ah ka va hruai a, ka nghak nghal. A exam chhungin Car ah fianrial hun ka lo hmang. 9:40 ah an zo a, kan haw. Chaw kan ei. Chaw ei khamah hna ka kal,ka buai lo. Tlai banah chaw. Zanah mut.

 5:30 pelh ah ka tho a, fianrial hun ka hmang. 6:15 ah Bawihtei ka kai tho. A exam tur a ennawn ve. School kal turin kan invai liam. Ka exer lo, ka indim vel mai mai. Bawiha School ka hruai a,  hna ka kal zui. Buai over lo na a, tih tur awm ve reng. Ban ve leh Dingdi exam tur Maths ka enpui a, kan ti kan tia, kan laklawh a, chaw pawh lehkha zir chungin kan bar liam vel mai mai. Mut hma zawng kan bei. 

 Dar 6:15 ah ka tho a, Bawihtei ka kai tho nghal. A insiam a, a exam tur a ennawm vel, a bulah ka lo thu ve mai mai. Dar 7:20 velah an kal liam a, fianrial hun ka hmang. Chaw nghei ni a nia. Mahse U Makhawma ka hmu a, ka dul hnuai deuh, khawihli ang deuh hi anti-biotic ei rawh a tia, anti-biotic ei dawn chuan ka tia, chaw ka ei leh hnuhnawh. Bawihtei School bang nen kan ei rual a ni. Vai chawlh a nia, Bawiha School a chawl a, kei pawh office kan chawl. Chaw ei khamah damdawi chu ka va lei- Cefadrox 500 a ni. Bawihtei nen lehkha kan zir a, kan zir nileng ta thaks a ni. Tlaiah an unauin Park ah ka chhuah thawven pui zuai. Kan haw a, chaw ka chhum a, chaw te kan ei fel a, lehkha kan zir leh nghal chur chur. Mut hma hun awl tlem kan nei.

 5:30 vel a ni ka thawh ni. Fianrial hun ka hmang. Bawihtei School kal tur ka thlah liam, ka tlan zui. Tukin chu tlan ringwt ka ti a, exer lo, chhuat ka nawt zâwk. Chaw ei khamah Bawiha School ka hruai. Hna ka kal zui a, ka buai over lo. Tih tur neuh neuh erawh a awm nileng. Bawiha School bang ka hruai lawk.  Zanah Bawihtei lehkha ka zirpui. A nu nen hian an zir tlangpui a, zanin chu ka zirpui. Kan mu hma. ka tho leh a, Sermon tur ka inbuatsaih.

 Ka tho hma leh viau. Fianrial hun ka hmang. Bawihtei pawh ni dang aiin ka kai tho hma hret. Lehkha a zir. Block Test(Exam) turin kan invai liam. Exer ka la zui. Friday tlai atang khan ka lai hnuai,ka kap chung deuh ah hian khawihli fahrah emawni a awm deuh a, mi kam deuh. Exer zawh ah office ah ka kal a, hna ka thawk zuai. Friday tlai khan pending tlem ka dah a, ka rilru kap tlat a, vawiin office tan hma han clear zuai ka tum a ni. Chaw ei khamah hna ka kal. Bawihtei exam zo pawh dar 10:00 pelh velah a lo haw. Bawiha School uniform tur leiin anu leh amah Bawiha nen kan kal- kan rei lo. Pisa lamah ka buai chhunzawm.Tlai ni kan leng. A haw hma theih loh. Haw ve leh naupang ei tur ka buatsaih sawk sawk a, an ei zo a, ka ei ve nghal. Bawihtei lehkha zir hahchawl intithawveng duh Uno te, CHess te ka khelh pui. Bawiha pawh Chess a zir ve tan deuh. Kan mu hma.

 Tho hma lem lo. Fianrial hun ka hmang. Chaw ei khamah Car ka hru fai. Dai tla nge ni, a lo râng le fu tho mai. Kan awm mai mai, chawlhni a nia, kan chawl. Tlaiah kan chhungin kan inkhawm. Banah ka nupui fanaute an haw. Kei Thalai Fellowship ah Bible Studey neihpui turin min ruat a,ka awm hnufual. Zirna nei hlei lo hi Bible Study tur hian min ruat ve leh nawlh thin a, a inthlahrunawm hle a ni. Tawngtai hlawhtlin dan tih ka sawi. Banah kan haw vang vang. Kan meng rei lo.

 Tho hma lo. Exer lo. Fianrial hun ka hmang. Chaw ei khamah Car ka sil fai. Ka fate nen kan infiam. Dingd lehkha zir turin a insawr bing. Tlai dar 3 ah CMCS Joint Meeting kan nei. Kumtin CMCS hnuaia rawngbawltute Joint Meeting kan nei thin a, Thlarau lam leh kohhran inrelbawlna lama hmasawnna tur thute kan ngaithla a, Department hrang hrangte kum khat hmachhawp kan pharh thin bawk. Vawiin pawh chutiang chuan hun hlawkthlak tak kan hmang a, chaw kan ei nghal. Zan kan meng rei hran lo.

 Ka tho hma leh. Fianrial hun ka hmang. Bawihtei te'n Study Leave an nei. Exer ka la. Chaw ei khamah Bawiha School ka hruai.  Hna ka kal. Buai pangngai vel thin khawp mai. Banah Mawng hung hman lo, ei rel nghal. Zanah TT ka khel hram- Pu Kva nen. Kan meng rei hran lo.

 5:45 vela thawh hi ka tihdan tlangpui a nia, tukin chu ka tho hma lehzual. Fianrial hun ka hmang. Bawihtei a lo tho. An Block Test tur Mental Maths ka ennawn pui. School kal turin ka vai liam.Exer ka la zui. Vawiin Mizoram State Day a ni. Raj Bhavan Kolkata ah Governor sawm angin kan va kal. Nikum khan kan kal tawh a, kan zawngchhang lo khawp mai. Ek-Bharat Sresth Bharat programme hnuaia Governor e'n an tih ngei ngei tur an State a State dag mi awmte puala an tih tur dan  an zawmna mai a nia, min ngaihpawimawhna tak tak a awm lo. Nikumah Governor a lo awm lo a, a aiawh Officer in thuphate chawiin min lo dawngsawng a, programme ho deuh kan hmang a, thingpui leh a hmeh thehlep deuh kan ei. Kumin phei chu Programme tan dawn tak takah Governor a awm lo, an tia, a awiawh pawh an awm chuang lo a, kan keimahni leh keimahni kan va inhawrkhawm vel mai mai a ni. Arunachal State Day a nih ve tho vangin anni pawh an lo kal ve. Thingpuiin min la daih lo zui. Raj Bhavan kan thleng chiah a,...

 Ka tho hma leh fu.Fianrial hun ka hmang. Dingdi ka thlah liam a, chhuat te ka nawt fai hlarh hlarh a, Filter te ka silfai surh surh. Chaw nghei ni a nia, ka exer lo. Bawiha School ah ka va hruai a, hna ka kal zui. Buai thin viau. Buai nak laiin naktuk State Day a Raj Bhavan kal thei turte buaipuiin JRC leh ARC nen kan han buai leh rawl. Tlai banah ka haw a, ei tur ka buatsaih a, ka fate nen kan ei. Bawihtei lehkha ka zirtir zui a, mut hma thleng.

 Ka tho hmaleh fu. Fianrial hun ka hmang. Exercise ka la. Chaw ei khamah Bawiha School ah ka hruai. Hna ka kal zui. Ka buai hle e. Buai deuh chur chur rengin tlai ni ka leng a ni. Bawiha School bang ka va hruai a, 'ngati nge i lo kal chak mah mah' a lo ti, a lo la kham vak lo a nih hmel. Dingdi Block Test(Exam) turin a inbuatsaih chho ve malh malh reng.

 Weekdays ah chuan 5:45 vel hi ka thawh dan pangngai a ni mai e. Fianrial hun ka hmang. Bawihtei ka thlah liam a, exer ka la. Chhum a zing chuais. A vawt tawh lo. Jacket ka ha a, a zawr hneh ve hle tawh. Nimin inkhawm naah khan Bawiha'n lehkhachaih  a chhar a, han chaih vel a tum a, a chhe tawh angreng sia, a ti hleithei lo. Lehkhachaih thar ka han siam sak leh ang lawp lawp a, chaih erawh a la chaih thiam em em lo. Chaw ei khamah Bawiha School ka hruai. Hna ka kal nghal. Ka buai fu. Buai nak lai chuan Chapchar Kut Celebration Committee JRC Office ah Meeting kan han nei leh hrih. Welfare in Chapchar Kut hi a buatsaih thin a, kum engemawzat kal ta atang khan Mizoram Sawrkar hian JRC Chairmanship na hnuaia Chapchar Kut huaihawt turin a rawn ti thin a, Rs 70,000/- a rawn pe thin. Hetah chuan a hmingin JRC hruainain vawi khat kan han Meeting a, Kohhran aiawh te, Welfare aiawhte sawm an ni thin. A hmingin kan Meeting a, Welfare kutah kan dah a, anni'n a ngai angin an ti zui mai thi...

Tho hma hran lo. Fianrial hun ka hmang. Chaw ei khamah Car ka hru fai leh thuak thuak. Eng vak kan ti lo. Chawlhni a nia, kan chawl. Tlaiah kan chhungkuain kan inkhawm. Sunday School hming ziah ni a ni. Pawl hnihna- nuho pawl hming ka ziahsak. Kan bang a, kan haw. Maa flyover lam atangin kan haw. A kual hret na a, a clear nuam zawk a, kan nu phei chuan a duh zawk. 

 Ka tho hma lo vel. Fianrial hun ka hmang. Exer ka la lo vel. Ka inthlahdah zuai. Ei ka siam a, ka fate nen kan ei. Chaw ei khamah Car a tifai a, Bawiha ka sirah a infiam. Bawihtei chu alo chhuk ve peih lo a, inah a awm. Petrol ka va la zuai a, ka haw a, inah ka fate nen kan awm.Inrinniah Committee leh Programme dang ka neih bawk si loh hi chuan ka fate an hlim thei hle- Kan in awm nileng. Zanah CMCS Joint Meeting Programme tur ngaihtuahin Onlie Meeting reilote kan nei zuai. Kan mu har lo; mahse naupang an mu hil lawk lo a, khumah kan ri sek hlawm.

 5:40 velah ka tho a, fianrial hun ka hmang. Dingdi ka thlah liam a, exer ka la. Vawt ve deuh var. Vawt tih lemah a nuam, boruak uap a awm lem lo.  Chaw ei khamah Bawiha School ka hruai a, hna ka kal zui. Ni tla van vuaiin hna kan thawk. Ka haw a, ei ka rel. Ei ka rel tih lemah chaw chhum leh chawhmeh siam sa tih lum vel a ni ber. Naupang ei tur ka siam sak a, ka ei ve nghal.

 Ka tho hma ve viau thin. Fianrial hun ka hmang. Dingdi ka thlah liam a, exer ka la. Ka chau viau mai. Khua a  vawt tawh lo viau a, exer naah hi chuan Jacket ka la ha, Dingdi paw'n School ah kawr lum a la ha. Awm mai mai leh in chhungah chuan kan ha tawh lo. Kan nuin kawnr lum tam zawk chu a su fai a, a dahtha leh hmaks tawh. Chaw ei khamah Bawiha School ka hruai a, hna ka kal zui. Kan buai lem lo na a, kan buai lo lem chuang lo. Tih tur neuh neuh hi chu a awm ve zel a ni. Bawiha School bang ka va lam a, chhun laiah phei chuan khawlai a sain a lum kher mai. Tlai lamah Thosi namen loin a rawn tam lehnghal. Office chhungah pawh min zar deuh huai huai thei hial a. Keini Thosi len kan lo hlip fel leh vek tawh sia, zanah Thosi a tam ka ring a, All Out Liquid ka chah thar. Bawihtei exam turin a inbuatsaih chho ve mawp mawp reng a, Bawiha pawh School a luh hnai ve tawh avangin ABC ziah dan vel a zir chho ve. 

 Ka tho hma lo. Dar 7:00 ah ka tho a, Dingdi School kal 7:30 velah ka vai liam. Fianrial hun ka hmang. Chaw nghei ni a ni. Bawiha School kal ka hruai. Hna ka kal, buai over lo.

 5:30 pelh ah ka tho. Fianrial hun ka hmang.Dingdi School kal tur ka vai liam a, exer ka la. Exer ka la pangngai fu a, chaw ka ei tlem lem loh vangin ka rihna erawh ka paih lem lo, pawi ka ti lem hrih lo. Chaw ei khamah hna ka kal. Vawiin chu ka buai lem lo. Bawiha pawh School a kal a, a nuin a hruai a, banah keima'n ka va lam. Banah TT kan khel Pu Kva nen chauh kan khel a, kan bei nghek mai. Zanah Dr.Mami te na lo leng a, an haw ah kan mu- 9:30 a ni. Naupang mut hnuah ka tho leh a, Bible Study tur ka in en vel a, movie te ka en leh bawk a.

 5:30 pelh hret khan ka tho chhuak. Fianrial hun ka hmang. Bawihtei School kal ka vai liam a, kei ka exer zui. Nuam thin viau a ni. Bawiha mit a la dam chiang chiah lo a, School a la chawl. A chawl rei ta hle mai. Kei pisa ka kai. Ka buai nghal chur chur hle mai. Ram hnuk khawih lutuk lo, hna tenau te te khawihtu ka nia, namnul ngawt theih si loh, ropui taka han tih hluai tur ni si lo hian ka buai nileng ve thin a ni. A chang chuan ka theihna hi ka va han hmang chhuak lo e aw, te ka tia, a chang chuan engtinmah ka ti lo. Chutiang chuan buai reng rengin tlai ni ka leng a, ka haw a, ka fate'n nghakhlel takin min lo thlir a, Bawiha phei chuan, "apa, ngati nge haw rei thin a," a lo ti, 'ngati nge i haw har thin' a tihna a ni. Chaw ka chhum a, eitur ka han buatsaih zung zung a, kan ei. Bawihtei te exam a hnai tawh a, a nu duty na bulah a chhuk a, anu nen lehkha an zir. Kei leh Bawiha kan inkawm. Dar 9:30 ah mut zai kan rel a, naupang an muhil thuai a, Sermon leh Bible ...

 Ka tho hma lo a ni. Fianrial hun ka hmang. Chaw ei khamah Car ka zu hru fai a, ka hru ka hru a, ka sil law law. Chhun lam chu kan awl awl mai mai. Chawlhni a nia, kan chawl. Bawiha mit na deu avangin a nu nen inahh an awm a, Bawihtei nen kan inkhawm. Nutei lo zin lai a nia, kan rualin a lo kal ve a, Dingdi thiannu Amelia a lo kal bawk a, NIH Studen thar Dorothy a lo kal bawk. Kan inkhawm Pu Remsanga fanu Emily leh Pu Romeo fanu Naina te puitlingah an lawm lût. Pu Richard-a Thalai Fellowship ah leh a hnu lam mi ina chaw einaah a la kual dawn avangin a driver hruai Bachu-a kan rualin a lo haw. Ka khalhtir a, kei ka awm awl. Zanah Nutei a lo leng a, dar 9:00 velah a haw. Keini chhûng chu kan mu leh ta mai a. Naupan mut hnuah reilo te Movie ka en.

 Ka tho hma lo tlat. Exer la tur ka nia, ka la lo tlat. Inthlahdah tlat. Fianrial hun ka hmang. Chawlh a ni bawk a, chaw ei khamah ka fate nen kan inkawm a, kan theuhleu vel. Chhuat lka nawt turh turh bawk tak e. Chhuanpuii Bagree ah a kal avangin kan pafain kan in awm nileng. Kan hlim hle. Tlai dar 5:00 ah SEC Meeting turin kal a ngai a, a nu alo la haw lo a, ka lo nghak hret a, a lo thleng tep tih ah ka kalsan. Inhnuai maiah kan Meeting. Kumtir(Term thar) Meeting hmasa ber a ni bawk a, Agenda a tam phian a, kan rei phian bawk a. Secretary ka ni tawh lo bawk a, hahdam leh thawveng deuhin ka meeting; Mahse Sub-Committee pahnih velah emaw chuan Convener turin min ti hram a. Meeting banah chaw kan ei nghal. Secretary nih chuan Committee Meeting zawh chiah hian hna  a intan thin a, ka thawveng ta huai a, enjoy theih hiat hiat khawp mai.  Moses(Chaplain) leh Mca(Thalai Leader thar) an lo leng kawi a, Green Tea in pahin kan titi a, CMCS inkhawm kan kal tlai thei lutuk a veiawm...

 5:45 ah ka tho a, fianrial hun ka hmang. Dingd School kal tur ka thlah liam a, exer ka la. Nuam fu. Ka khûp hi a na deuh a, taksa a lum hi chuan a zia chho ve leh mai. Tlan tirh hian a sak deuh thin. Bawiha pawh a dam tawh a, mahse School kan la hahchawlhtir. Nilengin a e lo a, pum na pawh a sawi lo. Chaw chu ni danga a ei aiin a la ei tlem. Hna ka kal. Buai over si lo.I.A ah artui leh balhla vel leiin ka va kal lawk. Office AC hi kan on na a rei leh tawh a, vawiin chu min chhem vawt lek lek. Tlaiah ka haw a, ei ka rel. Chaw kan ei a, Kan infiam mai mai. Zan ka meng rei tehchiam lo.

 5:30 ah ka tho a, fianrial hun ka hmang. Dingdi Schoolkal tur ka vai liam a, exer ka la zui. Khua a thiang viau. Bawiah chaw ka siamsak a, a ei laiin pum na a sawi leh deuh a, a kua a tha lo bawk. School kan chawlhtir leh. Office ah ka hruai a, ka buai em em mai sia, ka bulah a lo mu zal vel. Ek a cheh deuh a, ka han tifai a, ka han thlak fel leh. A nuin kathalo damdawi a rawn lei a, a ei. Pakhat zawk a ei mai a; pakhat dang a ei leh kha a tui lo a ti lutuk a, ka pawm sia, min luak khum chiam. Kan han inthlak fai leh. Amah chu a harh phian a, field bul kawngpuiah te a scooter tein kan va round. Dingdi pawh School ah a pum a lo na deuh a ni awm a; mahse damdawi an lo pe a, a reh leh mai, a irhfiak uk uk reng. Zanah Welfare Sports Champion lawmin Salt Lake group te Third Floor ah kan pung khawm a, kan thahnem phian legnghal a, 100 vel kan niin an sawi. Chaw kan ei har phian. Hruaia'n nuam a ti phian a, a lam zuang awlh awlh reng a, naupang dang nen an infiam a, an lim kual vel. Dar ...

 Ka tho hma em em hran lo. Fianrial hun ka hmang. Chaw nghei ni a ni. Exer ka la lo. Dingdi leh Hruaia School kan kal lohtir ve ve. Dam chu an dam zui viau a, kan hahchawlhtir mai mai. Hna ka kal. Chaw hma kan awl viau a, chawhnu, tlai lamah ka han buai tak tak a, ka va buai e aw. Ka buai lutuk a, ka haw daih. Khua a thim tawh hi chuan fate ngaihtuah an na thin. Chhuanpuii ni khat kar danah chawhma leh chawhnu a in duty chhawk a, chawhnu a duty ni hi chuan zan dar 8:00 ah a haw thin. Dingdi te unau anmahniin an lo awm mai thin a, kei hi khaw thim hmaa haw chhoh hman hram ka tum thin a.

 Dar 5:45 ah ka tho at mai. Fianrial hun ka hmang. Dingdi School kal tur ka vai liam a, exer ka la zui nghal. Tukin chu ni chhuak pawh a thiang kûk mai. Thlan pawh a tla tha ve leh duh viau tawh e. Bawiha chu a tho harh tha e. Nizan vawi hnih a luak bak chu a ti leh ta lo. A pum erawh nuam zan lo deuhin a la awm a ni. School kan kaltir lo. Chaw pawh ni dang a ei ai tlem a ei. Office ah ka hruai a, a harh phian a. Hna ka kal. Buai ve chur chur zel. Khua a vawt lem lo. Lum over ni lo mahse summer rim a nam nghal der. Tlai lamah Dingdi a nuam lo ve leh. Taksa rawl, luak chhuakin a awm. A damdawi ka va lei chhungin vawi khat a lo luak hman. TT ka khelh chhungin vawi khat a luak leh. A bak chu a bei ta lo, a harh tha.

Dar 6:00 ah ka tho a, fianrial hun ka hmang. Exercise ka la. Chhum a zing chui mai, ni a lang lo. Vawiin Dingdi te School an chawl a ni. Hruaia pawh eng Puja programme vel emaw a ni dawn a, kan kaltir lo. Hna ka kal. Ka buai nek nek. Nutei alo leng zuai. Heta awm thin, haw ta,lo zin a ni. Tlai banah ka haw, inthlak loin ei ka rel. Chawhmeh thingte ka modify. Ka fate nen chaw kan ei. Bawia'n ni danga a ei ang a pha chiah lo, a ei bang ve tlat. Zan mut dawnah Bawiha'n ka pum a na, a tia, ka pawm. A nuin u Mangaihi te pumna damdawi a va dil, Dorah pawh a pum a na, vawi 7 lai a luak tawh a lo ni. Damdawi kan pe chiah a, a luak chhuak nghal vek. Kan inpawm a, engtin tin emaw chuan kan muhil. Dar 11:30 dawnah muhil chungin a rawn luak leh.

 Tho hma lo vel tak ka ni. Fianrial hun ka hmang. Chaw ei khamah Pu John-a te haw tur inhnuaiah kan zu vai liam. Car ka tifai ngfhal a, ka fate an infiam kual. Kan haw chho a, kan inbual fai sawr sawr. Eng dang kan ti lo- chawlhni a nia, kan chawl. Tlaiah kan chhungkuain kan inkhawm. Inkhawm banah Maj.Dawnga te inah kan leng. Uno kan khel. Uno Playing Card hi an uar vel khawp a, ka lo ngaihven ngai lo a, kan han khel ve chhin a, Dingdi'n nuam a ti em em mai a. Blink it ah kan chah ve nghal. Chaw ei khamah kan haw a, inthlak loin Dingdi nen Uno kan han khel leh zuai a. Riei lo te phone an en a, dar 10:00 a lo ri a, kan nu. Khua a vawt lo lutuk tawh a, vawiin pawh kawr ban bul nen ka inkhawm ve;l mai mai tawh a ni.

 Ka tho hma lo kher e. Fianrial hun ka hmang. Naupang chaw ei tur ka siam, an ei fel, ka seng fel. Khua a lum hiam hiam.  Vawiin chu Indoor Sports kan nei a, inhnuai third Floor ah kan che vel. Table Tennis kan khel a, 2nd Round ah Pu Kva nen kan intum nghal a, ka hneh lo a, ka tla nghal. Pu Kva'n Final ah Pu Remsanga hnehin a champion zui ta. Nikumah Semi Final ah Pu Kva ka hneh a, Finala ah Pu Remsanga ka hneh lo thung. Kumin chu ka che bon lo khawp mai. Practice lai atang tawh khan ka che thei lo chho tlat. Kumin chu Pu Mazuala leh Pu Zorema pawh an khel tha khawp mai. Semi Finala ah Mazuala leh Pu Remsanga an intum a, Mazuala'n Game hnih a la zawn nghal ta mai a, Pu Remsanga a chak lo tep, mahse a rawn comeback leh thei hlauh. Pu Zorema paw'n Pu Kva a rawn chhaih buai pha tep. Kolkata Mizo ah na na na chuan Pu Remsanga leh Pu Kva leh Kei hi kan han indah chungnung deuh a; mahse kumin chu kei ka nawi ta riau bakah fixture a fuh zan lo a, seeded kan insu hma lutuk a, Best...

 Ka tho hma ve leh fu. Fianrial hun ka hmang. Exer ka la. Dingdi te School an chawl. Hna ka kal. Bawiha te an tan tlai hret a, ka va hruai. Hna lam kan buai tehchiam em em hranpa lutuk fahran lo. Khua a lum ta hiam. Zanah TT kan khel. Vawiinah pu John-a Hospital atangin a lo chhuak a, Room No.606 ah an thleng a, zan mut hmain kan han kal zuai. Dar 10:00 velah kan mu. Naupang an muhil. Welfare Sports neih mek a ni a, chutah chuan thlalak like tu nei tam inelna kan siam a, zanin dar 12:00 thleng hi hun kan hawng. Group pahnihte an tang hle a, an inlehpel chho zak zak. Kolkata Mizo khawtlang Online boruak a nung vut vut hle. Incharge kan nih avangin ka vil ve reng a, dar 12:00 a rik chiahin kan khar a, Salt Lake Area lam(Blue House) an chak. Group lamah hlimawm takin an han discuss zui leh viau a, an mu reh ta. Chaw thing ka ei a, Movie ka en zui. Dar 2:00 velah ka mu ve ta.