Ka nitin nun

 Ka tho hma vak lo. Fianrial hun ka hmang. Chaw kan ei. Eng va kan ti lo.  Chawlhni a nia, kan chawl. Khua a lum beuh beuh. Dar 2 pelh deuh ah inkhawm turin kan chhuak. Inkhawm banah thalaiin sum tuakna atan Sugar le BP an check a, ka sugar 130 a ni. Inkhawm kal hmain Maggi leh Sprite vel ka eiin ka in a, after meal ah chuan a sang lo. Kan haw vang vang.

 Dar 7 pelh ah ka tho. Fianrial hun ka hmang. Chaw eite ka han siam a, kan ei vel. Zing atangin lum nghal hiam mai a, han tei chhuah peihna chi a ni lo. In chhungah ka fate nen kan infiam a, kan nui vak vak a. Tlai ni nemah Car ka tifai. Zanah dar 10:30 ah kan mu a, Dingdi nen Movie en turin  kan tho leh a, Bawiha pawh a lo la muhil lo a, a lo tho ve leh a, kan tho leh vek, hehe. Mahse a nu nen an mu leh thuai a, Bawihtei nen kan en zui. A lum lutuks.

 Dar 6pelh hretah ka tho. Fianrial hun ka hmang. Exer ka la.Nuam ham ham khawp mai. Hna ka kal. Khua a lum ham ham viau.40 hawlh thuak thuak. Financial year ending a nia,kan buai nek nek. Dar 7 pelh velah kan haw. Chaw ka ei. Dar 10:30 velah mut zai kan rel. Bawihtei nen kan tho a, TV kan en leh. Dar 1 dawnah kan mu. 

 Dar 6 pelh hret ah ka tho a, fianrial hun ka hmang. Chumi zawh ah exer ka la. Rawl zualpui chu a zia tawh a; mahse a la sak fat fat fu. Naupang ei tur ka buatsaih a, ka eitir. Ka inbual fai a, ka ei ve. Hna ka kal. Buai nek nek, Financial Year ending a nia, neuh neuh. Chhunah IA Market ah ka va kal a, arsa leh dal ka va lei zuai. A lum sa hup hup fu. Tlai lam pawh dar 7 velah kan haw thei hram. Maj.Dawnga te chhungkua leh Chaplain Moses chaw eiah kan sawm a, ban veleh kan nu rawng ka bawlpui. Chaw ei khamah kan titi deuh reng a, tawngtaina hunte kan hmang a, an haw. Moses a la awm hnufual hret. 10:30 pelh hretah a haw. Mut zai kan rel.

 Dar 6 pelh hretah ka tho. Fianrial hun ka hmang. Chhuat ka nawt turh turh a, Filter ka silfai leh surh surh. Hna ka kal, buai lem lo. Lei tha, Vermicompost ka va lei a, water Melon-ah ka vur. Zanah TT kan khel, Pu Remsanga leh Pu Kva ka hneh lo viau, tan ka ngai. Mu hma lo.

 Dar 6 velah inperh tho. Rawl thum mai. Fianrial hun ka hmang. Ka tlan, ka rawl thum mai, nimin aiin a tantir chu a sak zawk. Vaiwin chu full exercise ka han chhunzawm leh tan a, nuam chho viau dawn e. Ka rawl ngawt ang. Hna ka kal a, buai fu, nimin ai chuan a zia e. Zanin chu TT kan han khel ve leh a, Pu Remsanga nen kan khel a, hneh lo fu mai. Ka bat a la chhe zui. Banah ka haw a, Ka bat chhiaa mi rubber ka la thla a, bat chuangtlai awmah ka bel vel ta mai mai hrih a, duhthu chu a sam lo fu. Sum neih chuan bat thar lei a ngai fu, sum erawh nei lo fu. Zan mut chu naupang lamin an harsat leh fu. Kei ka tho hma a, ka chau nen, ka mu h

 Dar 6 velah ka tho. Fianrial hun ka hmang. Chumi zawh ah ka tlan. Kar thum vel lai emaw ka awl ta. Khawihli vang kha a ni. Chawlh vang vang hnua han tlan leh theih chu nuam khawp mai; hah erawh a hahthlak, kan zi tawlh tawlh mai. Exercise dang ti loin tlan ringawt ka ti hrih. Nauoang School an chawl. Hna ka kal. Ka va han buai tehreng em aw. Buai khawp mai Buai reuh tak ka ni. Ka hman lo a ni. Thingpui an rawn chhawp pawh ka han melh lo hlek chhungin a lo dai duak hman zel. In lamah naupang riltam an lo awm tawh dawn tih hre chungin zo lo chungin ka haw a tul si maw, heh. Mawng hung hman loin ei tur buatsaih leh nghal chur chur. Dam man a awm thin e. Chawte kan han ei kham chuan kan thu hahdam ve ta. Kan infiam a, kan hlim vel hle, ka fate nen. Dar 10:30 velah kan mu. An muhil leh thei lawk lo a, an ninhlei kual leh reng.

 Dar 7:30 vel a ni ta awm e. Fianrial hun ka hmang. Zing tawngtai inkhawm ka kal. Ka haw an lo la tho chiang hlawm lo. Car ka zu tifai leh. Ka chho, naupangin chaw an lo ei zo tawh. Kan ei ve. Chaw ei khamah Mapuiate an haw phei. Bawiha Roller Skate tawlh ka zirtir a,a bak chu engmah kan ti lem lo, chawlhni a nia, kan chawl. Khua a nuam fu mai a. Tlaiah kan chhungkuain kan inkhawm. Inkhawm banah kan haw a, in lut loin Mani Square ah kan kal a, a nuin Westside ah a thil thleng duh vel a thleng fel a, Mc.Donald'd ah kan chawl. Kan haw a, Bawihtei leh a nu Movie en turin ka chhuahtr a, Bawiha nen kan awm. Bawiha chaw tur ka siamsak a, midang phei chuan chaw kan ei peih ta lo a ni. Bawiha paw'n a ei tam lo. Dar 10:30 ah mut zai kan rel a, naupang pahnih an muhil thei lo a, harh em em reng a, puitling kan muhil. An muhil zui ve ta mai a niang a.

 Ka tho a, fianrial hun ka hmang. Nizan an meng rei bawk a, naupang an tho har. Keimahin chaw ka ei a, ka ei khamah an lo tho ve. Eitur kan siamsak a, an ei. Ka tihfel zawh ah lu met turin ka kal. Ruah a sur. Lu meh hi ka ning thin khawp mai. Khua a nuam hle mai. Ka haw a, ka intifai vel a, ka fate nen kan awm mai mai a, Smart Bazar ah kan va tei phei. Chawhnu lam chu kan awm hahdam. Chapchar Kut kan hmang. Dar 3 tan tur a nia, dar li velah tan. A nu leh Dingdi an kal hmasa a, Bawiha tan a ninawm dawn vangin ka la kalpui ve lo. A hnu deuh ah kan zu chhuk ve. Naupangin custume parade an nei a, Bawihtei pawh Hmar Dress show in a rawn che tha leh hle. Bawiha paw'n nuam a ti viau a, Mizo naupang pawnto- 'tira mei kaiah, Pang aw inzial, tih vel an show a, a show tute'n a awmzia an hriat loh hmel hle, a incharge ten an han nem zial nawk nawk a, kan nui dur dur a. Bawiah nen ruai kan theh lo a, inah kan ei. Bawihtei leh a nuin an theh a, nuam pawh an ti hle. House kawtah Kût kan h...

 Sarih pelh ah ka tho. Fianrial hun ka hmang. Chawte ka han buatsaih a, kan ei. Hna ka kal a, ka thawk deuh zung zung. Bawihei zirlaibu lei turin Sarat Bose Road ah ka la. Traffic Jam turu mang tara. Darkar chanve tling lo kal tur a nia, darkar khat chuang ka kal tehreng a. Haw lam erawh a tluang ta deuh purh a. Tlaiah Bawiha te School Annual Day ah kan kal. BD Auditorim ah an hmang a, a nuam vak lo a, Programme a chhangchhe viau bawk. Dar 4:30 tan an tia, a huna thleng turin min chah ngun viau a, kan va thleng a, 5:30 velah min han tan pui tehreng a, kan ning hman hle. Programme an organise thiam loin a buaichuar em em. Han ruahman pui zung zung ka chak hle, heheh. Bawiha hi inah engmah a ti duh ngai lo a, a lo zirin a lo hre ve nual chu a ni. Tan hmaa an hla play te a lo zawm a, a lo lampui vel thin. Ani berin nuam a tia, nuam kan ti ve mai. Chuan, kan nghahhlelh em em an Class item a lo thleng a, an lam ve ta a, a titha ber pawl a ni. Kan lawmin, kan chhuang hle. Ruah a lo sur d...

 Dar 6;30 velah ka tho a, fianrial hun ka hmang. Car ka hru fai hlawrh hlawrh. Kan vaiin Dingdi te School ah kan kal. Report lam ni a ni. Kan fanu duat pawh a pass a, Class IV  a ni ve tawh dawn e. Nimin lamah a titha ho lawmman semnaah English-I titha lawmman a lo dawng tawh bawk. Hindi erawh kan hnufum deuh a, pawi kan ti leuh. Kan haw a, chawte kan ei a, Bawiha School ah ka hruai a, hna ka kal. Buai over lo, hman vak chuang lo. Bawiha ka va lam leh. Zan lam chu chaw ei khamah Water Melon zamna tur ka siam vel. An unau plant ka khawisak a, water melon kan eina mu kan dah mai mai kha a lo tiak tel a, kan enkawl ta ber. Zanah Dingdi nen kan meng rei a, TV kan en. Shrek kan en.

 Dar 6:30 vel ah kan tho a, kan insiam. Dingdi nen School ah kan kal. Prize distribution an tia, Dingdi paw'n English 1(Grammar) ah honour a hmu ve hlauh a, ka lawm ve hle mai. Ka nghak a, kan haw. Hna ka kal. Buai lo over. Tlai banah Car Tape ka upgrade tir. Android, touch Screen ka vuahtir, Rs 6,700/- ka seng a, pawisa ka nei lo viau na a, ka awt ve deuh sia ni. Chaw ei khamah ka va lam a, ka nghak deuh reng.

 Tho hma lo, tlai lo. Fianrial hun ka hmang. Chaw ei khamah Bawiha School kal ka hruai. Darkar 1 chiah an kal a, ka va lam leh.  Hna ka kal a, ka buai over lo. AC Servicing ka tihtir a, in leh office ka kâr tawn zak zak. 'A fai viau hi, jet pump a ngai lo ang' a tia, a han kilh khawm a, a duh aiin a thaw tha lo a, Jet pump leh si ang, a tia, a ti leh a, a part engemawni a thlak bawk a, Rs 977/- min charge. Servicing pangngai hi Rs 400+ a nia, Jet Pump hian Rs 700+ a ni thin a, Part thlak nen kan seng tam ta hret. Chuan, zanah tui a la rawn far zui. Hetiang hi a awm châwk mai- engmah problem awm lo, kan servicing zawha buai deuh ta tlat hi. Zan lam chu inah kan awm mai mai.

 Dar 6 pelh ah ka tho. Bawihtei ka kaitho. Vawiinah an exam Paper vel check turin an kal a ni. Ka vai liam zawh ah fianrial hun ka hmang. CHaw ei khamah Bawiha School kal ka va thlah a, hna ka kal zui. Buai dan a nuam tawk vel. Bawihtei a lo haw. Hindi tih loh ah chuan a rawn ti tha hlawm fu. Hindi hi buaithlaks. Kan fail phah ang em, kan hre lo le. Bawiha School bang ka va hruai. Zanah Mani Square ah kan kal a, playzone ah an unauin an che vel a, nuam an ti kher chhap e. Kan mu.

 A hun ngai velah ka tho. Fianrial hun ka hmang vel. Chaw ei khamah Car ka hru fai zuai. Zan khat lekah pawh a lo paw hman viau thin. Khua a lum viau a sin. Kan awm awl mai mai, chawlhni a nia, kan chawl. Tlaiah kan inkhawm. Car AC nen pawh kan thlan dup. Sunday School a ni, Pawl khatna pa ho leh Tlangval inpawlh ka la. Inkhawm zawng zawng 40+ kan ni. Baptist an indan hma khan 50/60 kan nia, kan that deuh tumin 70/80, hun puiah 100 kan kai hian tam kan inti viau. Tunah chuan 40-60 inkar kan inkhawm dan tlangpui a lo ni chho ta. Banah kan haw, Hlimtei leh Nunui kan haw pui. Kan member hlui thin, lo zin leh ve ve an ni. Hlimtei chu Pi Seni fanu, New Town ah anmahni in an nei, Champhaiah an pem, an in luahtu tur tifelin a lo zin. Nunui chu Nelson-a bialnu hlui, hmanah thalaiah kan inhmang ho thin, a nu leh pa dam lo a lo hruai.  Pu Muana Guest House ah Bawngsa rep kan la haw a, GD Puchka an lei a, inah kan ei. Dingdi leh Faith an in video Call a, an inhre tawh lo tep. QMS ah an p...

 Ka tho. Fianrial hun ka hmang. Chaw eite ka han siam a, naupang nen kan ei.  Chaw ei khamah Car ka tifai a, a va han lum tehreng, huh nghal vek zel. Chhun lam chu kan awm mai mai, Uno te kan khel a, lehkhabute kan chhiar a, kan infiam a, Tv te kan en a, phone te kan en a. Khua a lum em em a, kan chhuak peih meuh lo. Tlai nemah Smart Bazarah ka va chhuah pui zuai a. TT kan khel, lum tha leh tawh fu a. Zanah Sunday School zirlai enlawkna hun Zoom online Meeting kan nei. Bawihtei nen Movie enin kan meng khawtlai leh hret a.

 A ngai ah ka tho- dar 7:00 vel. Fianrial hun ka hmang. Chaw ei khamah  chaw kan ei kham. Lum tak a ni ta. Darthlalang kan nawt fai a, kan che suau suau, Hruaia'n Colin Spray vel nuam a ti hle. An inbual fai a, keiin chhuat ka nawt. Lum tak a ni- ka huh vek. Chhun ni se sat lai phei chuan khawi ilo han chhuahna chi pawh ani lo. Vawiin Holi a ni tak, kan chawl tak. Holi atang hian Kolkata khawlum a intan tak tak thin, an ti tak. Ka fate nen kan inchhungah kan inkawm a, kan awm zawi vel mai mai. Tlai ni nemah park velah kan kal kual a, kan kal duhna tak an lo inkhar lehnghal a, Hruaia 'park No.1' tih ah kan kal ta mai. Chu chu an School kawng, I.A Market kawnga mi saw a ni. Kan haw a, kan inti fai vel a, chaw eite kan buatsaih a, kan ei. Zan lam pawh awm awl leh Movie en vel a ni. A nu leh Hruaia mut hnuah Bawihtei nen kan meng khawmuang hret a, Movie kan en. 

 Ka thawh dan pangngai, dar 7:00 velah ka tho leh a, fianrial hun ka hmang. Vawiin chu Bawiha te pawh School an chawl. Bawihtei te chu exam chawlh an la hmang mek a ni. Hna ka kal a, buai viau a. Office banah TT ka han khel ve leh tan a. Khawihli vangin taksa sawizawi lam ka awl ta vang vang kha a nia. Nuam fu. Lum fu. U Sangkimi te nufain chaw an lo ei leh. Tui vawtin ka inbual. Kumina tui vawta ka inbual vawi khatna a lo ni ta. Dar 10:00 pelh ah kan mu a, mut hmunah kan bengchheng leh hle a, Bawiha a phur thin hle.

 Tun lai chu dar 7:00 vel hi ka thawh dan a ni tlangpui. Fianrial hun ka hmang. Bawiha School kal ka thlah. Ka va hruai leh. Holi an tia, an lo inhnawih rang chiam a, ka lawm lo viau. Hna ka kal a, ka buai dan pangngai. Khua a lum chho ve hret hret. Zanah Bawihtei muhil thei lawk lo a, TV te kan en dun leh reng a, a han mu dawn a, muhil thei lo a, kan room ah a rawn insawn.

 Dar 7 vel a ni ka thawh ni. Fianrial hun ka hmang.  Chaw ei khamah Bawihtei nen Hruaia kan va thlah. Hna ka kal. Ka buai em, buai lem lo. Bawiha School bang ka va hruai leh lawks. Zan lam chu kan awm awl mai mai.

 Hma lo, tlai lo ah ka tho- chu chu dar 7:00 tihna a ni. Fianrial hun ka hmang. Chaw ei khamah Bawihtei nen Bawiha kan thlah. Hna ka kal a, ka buai lem lo a, ka awl lem lo. Pawn ni sa chu a sa ve viau tawh a ni. In chhung daihlim chu a hlim a ni. Tui lum hlirin ka la inbual a ni. Bawiha School bang ka va lam leh. Tlai banah chaw ei siam, chaw ei. Fate nen inkawm hlim. Zan dar kuaah SEC Zoom online Meeting kan nei. Dar 10:00 velah kan bang. Ka nupui fanaute Pi Hlimpuii te room ah an leng a, an lo haw ah mut zai kan rel. Bawiha a uang leh char char a, a tawng tawp thei lo. Dingdi a room ah mut hran a tu, a nauin a phal lo. A nau mut hnuah a insawn.

 Tlai lutuk lo, hma soi loah ka tho. Fianrial hun ka hmang. Chumi zawh ah zing tawngtai inkhawm ka kal. Chaw ei kham lam chu inkhawm turin kan insiam lawk vel a, a dang eng lem kan ti lo. Chawlhni a nia, kan chawl. Tlaiah kan chhungin kan inkhawm. Thu sawina hun ka chang a, 'Tling lote thlangtu Lalpa' tih thu ka sawi. Kum hnih chhung Programme Committee Secretary ah ka awm a, Programme draft tu ka nia, mahni sermon na huna indah a nuam lo duh angreng a, thu ka sawi zing lo viau a, Programme Committee kan siam loh kumah Kohhran Secretary ka nia, keimah bawkin Programme ka draft zui leh a, Sermon hunah Committee in min nawr luih viau tum tih loh chu ka indah lo. Kuminah Programme khawih hmasa tu ka ni ta lo a, Sermon hun min rawn pe hma viau. Pathian thu sawi hi chu nuam ka ti a, ka phur a, ka theih tawk chuan ka inbuatsaih nasa ve thin bawk. A rawngbawl min phalsak ve tu Lalpa tana theihtawp chhuah mai hi kan tih theih tawk a ni. Inkhawm banah kan haw nghal, mikhual pahnih kan p...

Dar 7 velah ka tho a, fianrial hun ka hmang. Bawihtei pawh a lo tho ve nghal. Chaw chhum ei siam chaw ei. Chaw ei khamah chhuat ka nawt fai hlawrh hlawrh a, chumi zawh ah inhnuaiah kan zu tei thla a, Car ka tifai a, naupang an lo infiam. Chhun lam chu kan awm hahdam. Inrinni a ni bawk a, kan inring. Chawhnuah New Town, Eco Park Mini Zoo ah kan va kal a, kan va hawi thawveng, kan thawveng hle. Kan haw a, dar 4 a pel. Rei lo te kan hahchawl a, SEC Meeting turin ka kal. Inhnuai, 3rd Floor ah kan Meeting. Chaw kan ei nghal. Banah Cobtea leh Joshua an lo leng a, Green Tea in pahin kan titi reng a, 10:30 velah an haw, Thehlei Rep leh Sakhi Sa rep tih vel kan pai haw tir. Kan mu zui deuh nghal mai.  

 Dar 7 pelh duai thleng ka mu. Bawihtei te exam zo an chawl tawh. Fianrial hun ka hmang. Chaw ei khamah Dingdi nen Bawiha School kal kan va thlah. VIP Tour Programme a awm a, office ah ka kal zuai a, hna ka thawk. Chawlh a ni. Inah kan awm mai mai. Tv ah Mizoram Chapchar quit hmang laite kan thlir mai mai. Bawiha School bang kan va lam leh. Tlaiah Park ah kan leng khawthawng. Smart Bazar ah kan lut zuai a,mamawh eng engemaw kan lei. Zan kan meng rei ve hret. Dar 10 vel.

 Bawihtei nen 6:15 ah kan tho leh a, a exam tur a revise leh malh malh. Kawngpuiah ka zu vai liam a, fianrial hun ka hmang zui.  Bawiha'n, "ka dam lo," a tia, School a kal lo. Hna ka kal a, buai phian e. Nuam viau thin. Ban lam pawh a hma thei thin lo a, Chhuanpuii Morning ni hi chuan tlai lamah naupang ho a uap hman a, a zia.  Pu Lianzela fanu, U Sangkimi leh a fapa chaw eiah kan sawm a, kan eiho. Pathian thu lamah a luangliamin a khat liam zawih zawih,kan tawng ve hman lo. Bawihtei te exam an zo ta. Thaw a veng huai. Eng tak ang ve ang maw? Zan dang aiin kan meng rei hret- Dar kar khat veln.   

6:15 ah Bawihei nen kan tho a, exam tur a revise melh melh. Kan invai liam a, fianrial hun ka hmang. Bawiha hi damlo chiah lo, nuam lo deuhin a awm a, a pang a lum ther ther a, damdawi a ei a, School chu a kal ve zel. Hna ka kal a, buai khawp mai. Bawiha ka va lam zuai a, buai leh nghal. Tlai thlengin ka buai a, a nu a duty sia, Baiwha nuam lo, Bawihtei lehkha zir ngai bawk. Hna thawh tur ka pawm haw nual. Chaw siam sawk sawk, kan ei sawk sawk, hna thawh chhunzawm. Zanah kan mu hma. 

 6:15 ah Bawihtei nen kan tho. A exam tur a ennawn, ka lo thutpui. A kal liamah fianrial hun ka hmang. Ka khawihli hi a pun velka hlau a, exer pawh ka la ngam lo a, tlemin pun deuh hram a, kawng hnuai, kekawr hrenna lai deuh a ni bawk sia, buaithlak fu ni. Hna ka kal,ka buai vel khawp a, ka ri deuh vat vat mai. Khua a lum tawh fu ni. Dingdi nen Bawiha School bang kan va lam. Bawiha hi nizan hmasa atang khan zanah a kut leh ke a lum vet vet a, nachhawkna te kan pe a, dam lo zui lemlo chuan a awm a. Zan lam pawh Bawihtei lehkha zir ka thutchilh chawt. Kan mu har lo thin.

 6:15 ah Bawihtei nen kan tho a, a insiam a, lehkha a zir, a bulah ka lo thu. 7:20 velah School a kal liam a, fianrial hun ka hmang. A exam zo ka va hruai. Kan haw a, chaw kan ei. Hna ka kal. Buai ve angreng, a nuam tawk vel. Pu Rabi Karmakar, kan electrician retire kan thlah liam.. Thlahna hun 3rd Floor ah kan hmang zuai. Tlai banah ei tur ka siam chaw kan ei. Dingdi lehkha zir turin a nju bulah a chhuk. Bawiha nen office ah kan kal a, hna ka thawk leh zuai. Zan kan mu hma.

 Tho hma lemlo. Fian rial hun ka hmang. Zing tawngtai inkhawm ka kal. Chaw ei khamah Bawiha nen kan chhuak, Betadine kan lei. Smart Bazar ah kan lut zuai bawk. Kan chhungkuain kan inkhawm. Kan haw, zanah Dingdi nen lehkha kan zir. Hindi Grammar an exam dawn a, har ka ti hle mai a, ka huphurh pui lutuk. Kan mu hma.

Hma lutuk loah ka tho a, fianrial hun ka hmang. Naupang an lo tho a, chaw eite kan siam a, kan ei a. Programme dang eng lem mah kan nei lo a, ka fate nen kan in awm.