13th January, 2025

 Ka tho a,fianrial hun ka hmang. Dingdi School kal tur ka thlah liam, a khuh khurh khurh. Exercise ka la nghal. Chhum a zing chuai mai. Fit chho ve leh deuh deuh e; mahse ka lo rih belh hman nual.

Chaw ei khamah Bawiha School ah ka va thlah a, office ka kal zui. Buai vak loh ka tum a, tih tur neuh neuh a awm a, ka âwl leh ta lutuk chuang lo.

Chhunah vai hoin an eng puja emawni denchhenin Kachori an rawn sem a, ina ka chhoh hlanin ka dawhkanah an lo dah. Ka awm lai chu ni se kalo hnar tur a nia. Puja thil reng reng hi sweet mum khat pawh ka ei duh ngai lo a, suala ka ngaih vang lam aiin keimah lam ramri inkham sak ka duh ve hrim hrim vang a ni ber. Ka ruih thlêk bûk bûk thin lai pawhin Puja thil kaihhnawih hi ka tem ngai lo. House Staff ho hian Biswakarma Puja hi uar takin an lawm ve thin a, ruai an siam hluah thin. Min sawm ve thin a, ka la eisak miah lo. Awle, ka lo kal ang, ka tia, min han sawm nawn leh hian, ka ei daih tawh a lawm, te ka ti mai mai thin. Ka chhungte erawh chu an duh phawt chuan ka eitir ve mai thin.

Tlai banah ka haw a,inthlak loin chaw ka chhum a, naupang eiturte ka buatsaih a, kan ei. Dingdi Hindi a zir deuh malh malh reng a, a nau nen kan infam vel.  A nu a lo haw a, chhung inkhawmte kan nei a, phone an en a, dar kua velah mut kan tintuah.