6th January, 2025

 Dar 5:45 ah ka tho a, fianrial hun ka hmang. Dingdi School a lût leh tan tawh dawn a, dar 7:30 rik hma deuhin kawngpuiah khuan an rawn lam thin a, ka zu thlah liam. Ka chho a, chhuat ka nawt fai surh surh. Chumi zawhah Morning exercise ka ti tan ve leh ta. Ka dam loh vangin ka âwl deuh vang vang a ni. Tlan lam ka la ti lo a, awm hmunah minute 45 bawr vel ka exercise. Dam chuan naktuk atangin tlan lam ka ti tan leh thei tawh ang chu.

Hna ka kal, ka buai em em khawp mai. Hna a inchherchhuan chho zut mai a, ka thawk chur chur a ni e. Mizoram Diary a lo thleng a, a bu lian nge a bu tê, tiin kan thlang leh sap sap a, kei chu hetah hian ka lo ziak tawh laklawh bawk a, kumin chu engemaw mai mai atan a bu tê ka lo la ang e, ka tia.

Bawiha a la nuam lo a, khawsik hi a la reh lo tlat a, antibiotic kan start ve leh ta mai. A damdawi tur ka va lei lawk a, hnaah ka bûr leh nghal chur chur. A nuin chawlh a la a, a awmpui ta mai.

Tlai lamah TT khel tu ho an rawn inhawrkhawm a, kei chu  Hruaia damlo nen ka phûr zân lo a, ka khel lo. Office bang ka haw chu a nu nen an lo mu dûn bâm mai. Bawihtei chawte ka siamsak a, kan ei. Zan mut dawnah chuan Bawiha pawh a hawiher a harhvang chho leh ta deuh. Dar 10 ah kan mu. Min pawm mu rawh, a tia, ka pawm a, rei lo teah a muhil mai. Harh loin a muhil tui tlang ta. Zanlaiah Thosiin min tiharh leh a, ka han veh a, pathum chu ka beng hlum a, ka mutsan, min la zar min la zar tho.