03.04.2025

 Dar 5:15 velah ka tho at mai. Fianrial hun ka hmang. Bawihtei te School kal tan ni tur a ni. Class IV  a lo ni ve dawn ta. Pool Car pangngaiah kan kaltir ve dawn tawh a, thawh hma lehzual hret a ngai a ni; mahse tukin chu an vawi khat lo kalna a nia, kawng an bel lo deuh a, an rawn tlai hret a, kan nghak hret. Thenawm nu, Class 2 naupang Dorothy nen an kal dun.

Ka vai liam a, exer ka la zui. Lum tha ve viau tawh a, thlan pawh a tla tha duh viau e. Bawiha chaw ka siam sak a, a ei laiin ka inbual fai a, ka ei ve. A nu a duty bawk avangin Bawiha nen office kan kal a, buai em em lo, pelhe thei si loin tlai ni kan leng. Khua a lum viau tawh a, vawiin tak hi a sa lem lo a, thli a awm deuh bawk na a, lum ti duh tan chuan sawi tur neih loh kara, 'a va lum e' tihna tur tawk chuan a lum reng tawh.

Dingdi School lo haw lam chuan a best friend Didhiti nen an rawn haw dun thei a, an hlim ngei mai. Didhiti hi naupang Smart tak mai a ni a, Subject zawng zawngah letter a hmu vek, tih ang chi kha. An inkawmngeih hle a; mahse kuminah hian an section awmna a in ang dawn lo tlat mai a, kan ui pui viau laiin Pool Car lamah an in partner chhunzawm thei dawn hlauh e. A lo haw chu a hlim khawp mai a, Class Vice Captain-ah min thlang leh a, Class enkawl leh a ngai dawn, a rawn ti ham ham. Nikum khan First Semester chhung Class Captain a nia, Second Semester ah Didhiti a ni thung. Kuminah Vice ah a awm a, an Captain chu a thiannu, amah kawmngeih em emtu tho, Nandini a ni. Nandini hian Youtube ah Mizo tawng a lo zir a, 'Ka pu Chibai' tih a thiam a, Dingdi nen an inhmuh apiangin, Ka pu Chibai, a ti ve ziah.

Zanah TT kan khel. Thlan a tla nasa a, ka zawr hneh leh ta khawp mai. Pu Kva ka hneh lo thei hle a, zanin chu Pu Remsanga ka hneh ve hlauh thung.

Zan lam chu 9:15 vel atangin mu turin kan insiam tan a, dar 10:00 ah chuan kan zan lai vek tawh.