24.04.2025

 Tho hma lehzual ta. Fianrial hun ka hmang. Dingdite'n Summer Timing an follow tan a, chhun khaw lum nasat lutuk hmaa bang hman turin tan hun an tihma a, chuvangin tlemin kan tukchhuak a hma lehzual hret. A pangngaiah 7:45 ah School thlen a ngai a, tunah chuan 7:15 a ni vah mai. Dar 6:30 hmain Pool Car a lo thleng a, kan invai liam. 

Bawiha School kal ka hruai. Anni hi 7:55 ah thlen a ngai ve thung. An School atangin ka tlan haw leh tauh tauh a, kawng a chep deuh a, ka tlan thinna kawng pangngai lakah chuan a nuam lo deuh na a, thlan erawh sawr chhuak hnem fu tho e.

Ka inbual fai a, chaw ka ei a, hna ka kal. Buai em em loin kan awm. Bawiha School bang ka va hruai leh. Khaw lum zia chu- Real Feel 48 a ni. A sa huam huam mai a, dam loh hlauhawm tak a ni. Chutih lai karah Bawiha hi haw kawng sir vela han thep kual vel hi a peih khawp a, Road Roller chungah a'n chuang chhin leh hrih thin. Kei zawng ka huh zawr vek a ni. In kan thleng a, Bawihtei School bang lo thleng tur Gate ah ka lo chang zui.

Aizawl ah Thla hnih chhung vel Training a kal na tur a awm a, kan pute'n "kal ta che" min tia, tun lai nula kan nei lo nen, kan chhungkaw khawsak buai vel ka ngaihtuah a, ka zuam vaklo a, vawiina Submit ngei a ngaih avangin lehkha chu kan thehlut ve ta tho a. Zanah chhungkuain lo sawi fel ula, min tia ni.

 Haw ve leh Aizawl ka kal tur thu chu ka sawi a, Bwihtei'n, "Aizawl Biryani min lo hawn rawh aw," a ti nghal. Ka cham chin tur ka han sawi chu a ngawi ta hmak a, a hnuah chuan insum thei loin a tap chhuak nghal hlawp hlawp a, a bang thei lo. Dingdi hian min ngai em em mai a, nikuma ni hnih thum ka zinsan hlek chhung pawh khan a nun a lo ngui vek, chaw ei hleithei loin a lo awm a, kei pawh hian ka ngai em em reng a.

Tuna kan Training tur hi Traning zawh ve leh Double increment hmuha hlawh pun theihna a ni a, hlawh pungte chu a mamawh ber kan ni ang lawi a; mahse, fate'n min mamawha min thakhlelh ngawih ngawih lai, an la tal hran theih hma hi chu a tam thei ang ber ka awp lum ang, tia khawtlang rawngbawlna te pawh ka lo tlansan tawh ang khan engzat increment pawh ni se chhungkua inthlahlel taka kan awm khawm tluka hlu hi a awm lo ang a, ka ti leh ta deuh a.