17.07.2025

 Tho hma leh vah vah. Fianrial hun ka hmang. Bawihtei School kal tur ka vai liam.

Vawiin hi Bawihtei piancham a nia, kum 10 a lo pumhlum ve ta reng mai. Naupang Special tak niin a lo sei lian a, Pathianin nasa takin mal a sawm a, min venhim sakin min kaihhruai sak a, ka va lawm thin em. Dingdi avang hian Pathian ka biak tam phah a, Pathian hnenah lawmthu ka sawi phah nasa em em thin.

A tet laiin a tap nasa em em mai thin a. Zan kan mu tha mang lo thin. A rawn leikang deuh hnu pawh khan mi dang lawm leh chhaih vel kha a duh lo, a tap zel. A hmel a thain a lawmawm bawk sia, mi hian an duh thin a; mahse tumah a duh lo. Kan thiannu Lalthazuali khan, "nau piang ka hmuh tawh ah a la tha ber," a ti hial.

A tawngfiah har hle a, tawngfiah lo chung chung hian a tawng duh em em mai a, thawnthu te hi ka hrilh thei lo, ka han hrilh ve dawn a, min lo sawi khalh zung zung zel. Hla phuah chawp a ching hma jle- ziak leh chhiar a thiam hma daihin. Ziak leh chhiar a rawn thiam chho a, story phuah leh poem phuah lamah a rawn tui chho nghal hle, tha deuh deuhin a ziak thiam.

Class-II a nih lai emawni khan a rough book ah India leh Mizo indo lai lem a lo ziak a,  a rilru hi Mizo vet vet tak a nia, ka chhuang hle.

Pathian thu lam a tuipui em em a, Bible ka chhiarpuiin Bible Story te ka hrilh thin a, ngaihnawm a ti thei hle. Sunday School ahte hian zirlai zir nuam a ti em em. Zirlai zir loa hla emaw special items tur zir ni an nei thin a, zirlai zir a chak zawk thu a sawi ziah.

A tet lai khan 'police nih ka chak' a ti thin. Tunah chuan 'Teacher, Fashion designer, Missionary' nih a chak thu a sawi thin.

Tun lai hian nula kan nei lo a, a nu nen hna kan kal a, an School banah a nau inah a awmpui a, a lo buaipui ve thei mai. Inhnuai maiah office kan kal bawk a, ngaihtuahawm loin a lo tifel ve thei zel.

Min ngai em em mai a, kei lahin ka ngai. Hna tul thila han zin a tul pawhin amah vang hian ka zin lo mai thin. Kum 10 a lo ni ve ta reng mai.Lalpa, kan va lawm em. A pu Chhuanawma'n pawisa a lo thawn a, a nuin KFC  a leiak a, School banah a ei. Kumin chu a hranpain kan lawm lo. Cross necklace ka duh a tia, a nuin Silver a leisak a, School a a sem tur Chocolate leh a plush toy ka leisak a, chu chu ni mai.

Bawiha School kal ka hruai, ni a sa ut mai. Ka tlan haw nghal. Ka khup hi a dam chiang lo. Ka tlan bai hlau hlau mai. Taksa a lum hnu chuan a zia hret. Inah exer tlem ka han ti leh a. 

Chaw ei khamah hna ka kal. Bawiha School bang ka va lam leh zawk. Thian a lo nei ve tawh a, min hrilh phur hle- A thiante hming chu, Rukhrash te, Asha(heihi ka hrechiang lo) leh a hming a hriat loh pakhat an ni. An in bye bye ve lawp lawp.

Khua a lalum a niang, ka thlan huh leh vek. Haw hnuah ka inthlak leh a ngai. Hna ka kal zui. Thu melh melh.

Tlai banah ka haw, chaw kan ei. Ka inkhel lo. Ka fate nen kan infiam mai mai. Zan kan mu har lo.